|
Gender statistikası – cinslər üzrə toplanaraq təhlil edilmiş və cəmiyyətdə gender məsələlərini əks etdirən statistik məlumatlardır. Bu məlumatları toplayarkən qərar qəbul etmək səviyyəsində və planlaşdırmada çalışanların, tədqiqatçıların, kütləvi informasiya vasitələrinin və oxucuların tələbatlarını nəzərə almaq üçün onlarla sıx əməkdaşlıq edilməsi tələb olunur. Məlumat istehlakçılarının bütün ehtiyaclarını nəzərə almaq üçün cəmiyyətdə gender məsələlərini və bu sahədə məqsədləri öyrənmək, müvafiq siyasətin aparılması və problemlərin dəyərləndirilməsi üçün uyğun göstəriciləri əldə etmək lazımdır. Azərbaycan Hökuməti Pekin şəhərində keçirilmiş IV Ümumdünya Qadınlar Konfransının «Fəaliyyət platforması»nı qəbul etmiş və ona uyğun olaraq, ölkədə gender statistikasının inkişaf etdirilməsi məsələlərini Dövlət Statistika Komitəsinə həvalə etmişdir. Fəaliyyət platformasında deyilir: «Milli statistika qurumları cəmiyyətdə qadın və kişilərin vəziyyəti ilə bağlı problem və məsələlərin cins və yaş üzrə bölgüsünü özündə əks etdirən statistik məlumatların toplanması, işlənməsi, təhlil və nəşr olunaraq yayılmasını yerinə yetirirlər» («Fəaliyyət platforması», maddə 206a, Pekin, 1995). |
| © Azərbaycan Respublikasının Dövlət Statistika Komitəsi |