|
Metodoloji izahlar
Bu bölmənin materialları ananın doğulduğu tarix və onun nikah vəziyyəti göstərilmiş doğum aktlarındakı məlumatların statistik yolla işlənməsi nəticəsində əldə edilib.
Doğumun ümumi əmsalı – bütün əhaliyə nisbətən uşaqdoğmanın intensivliyini müəyyən edən göstəricidir. Təqvim ilində diri doğulanların sayının əhalinin orta illik sayına nisbətidir. Əhalinin hər 1000 nəfərinə hesablanır.
Doğumun yaş əmsalları müəyyən yaş qrupunda olan qadınlarda il ərzində diri doğulanların sayının cari qiymətləndirmə üzrə müvafiq yaşda olan qadınların orta illik sayına nisbəti kimi hesablanmışdır.
Doğum zamanı ananın orta yaşı – cari ildə uşaq doğan bütün qadınların yaşlarından çıxarılmış orta riyazi həddinin doğumun yaşlara görə əmsalına vurulması ilə təyin edilir.
Nikaha daxil olmayan qadınlarda diri doğulanlara aid edilən doğumların qeydiyyatı zamanı uşağın doğulması haqqında akt qeydlərində ata haqqında məlumatlar ata və ananın birgə ərizəsi, yaxud da atalıq faktının təyin olunması haqqında məhkəmənin qərarı (bu barədə doğum haqqında aktda müvafiq qeydlər edilir) əsasında aparılır.
|