|
Metodoloji izahlar
Azərbaycan Respublikasının tərkibinə Naxçıvan Muxtar Respublikası, 66 inzibati rayon, 77 şəhər, 258 qəsəbə və 4257 kənd yaşayış məntəqələri daxildir.
Əhalinin sayının cari hesablanması əhalinin son siyahıyaalınmasının yekunları əsasında aparılır. Hər il bu ərazidə doğulanların və daimi yaşamaq üçün bu əraziyə gələnlərin sayı əhalinin sayına əlavə edilir, ölənlərin və buradan köçənlərin sayı isə əhalinin sayından çıxılır. Növbəti siyahıyaalınmanın yekunlarına əsasən əvvəlki siyahıyaalınmadan sonrakı dövrdə əhalinin sayı və tərkibi üzrə müvafiq dəqiqləşdirmələr aparılır.
Yaş – həyatda tamam olmuş yaşların, bir yaşdan kiçik uşaqlar üçün – ayların, 1 aylığa qədər uşaqlar üçün isə – günlərin sayıdır. Yaş tərkibi haqqında məlumatlar siyahıyaalınmalar zamanı sorğu yolu ilə əldə edilir. Bu məlumatlar ayrı-ayrı yaşlar üzrə x yaşdan x+1 yaşadək əhalinin sayının hərəkəti metoduna uyğun cari hesablamalar yolu ilə müəyyən edilir. Demoqrafik hadisələrin cari qeydiyyatına dair məlumatlar hesablamalar zamanı nəzərə alınır.
Təhlilin məqsədindən asılı olaraq müxtəlif yaş qruplarından istifadə olunur.
Cinsə və yaş qrupları üzrə əhalinin sayı haqqında məlumatlar 1926, 1939, 1959, 1962, 1969-cu illərdə mövcud əhali, 1970–2009-cu illərdə isə daimi əhali üzrə verilmişdir.
Yaş intervalları bu intervala daxil olan dəqiq yaşları özündə birləşdirir. Məsələn, «20–24» 20 yaşdan 24 yaş da daxil olmaqla 5 illik yaş intervalını göstərir, yəni 20 yaşdan 25 yaşadək olan intervaldır.
Şəhər və kənd əhalisi - əhali yaşayış yerlərinə görə şəhər və kənd əhalisinə bölünür. Şəhər yerlərinə şəhərlər və qəsəbələr aid edilir, qalan bütün yaşayış məntəqələri isə kənd yerləri sayılır.
İqtisadi fəal əhali – bütün işləyənlərin və işsizlərin cəminə bərabərdir.
|